KORONADAL CITY – Mas nagbudlay pa ang sitwasyon kag kapit-os nga ginabatyag sang mga mangunguma sa pungsod sa padayon nga pagsaka sang presyo sang produkto nga petrolyo.
Ini ang pagpati ni Mr. Leo Fuentes, Regional Coordinator sang MASIPAG Mindanao sa interview sang Bombo Radyo.
Suno kay Fuentes, bangud sa kada semana nga pagsaka sang presyo sang produkto nga petrolyo may domino effect ini sa pagmahal man sang serbisyo ilabi na nga naga-gamit man sang krudo kag gasolina ang mga mangunguma halin sa preparasyon sang talamnan padulong sa pag-transport sang mga produkto.
\Amo gani suno kay Fuentes, ginaduso nila sa incoming Marcos administration nga e-review ukon e-repeal ang Rice Tarrification Law.
Sa tion nga matigayon ini dako nga bulig sa mga farmers ang pagahimuon ni Marcos.
Dugang pa ni Fuentes, madugay na nga nagaantos ang mga mangunguma ilabi na nga kasubong nga napabay-an ang rice economy sang Pilipinas bangud sa pagpabor sa mga trader, kapitalista, dalagko nga negosyante kag importer sang bugas.
Kaangot sini, nagalaum ang MASIPAG nga masolusyonan sang madason ng administrasyon ang problema sang mga mangunguma ilabi na sa access sa mas manubo nga serbisyo, pestisidyo, abono kag teknolohiya.
