KORONADAL CITY – Nagsaka na sa masobra 23 ka libo nga mga pamilya sa bug-os nga Region 12 ang nangin apektado sang baha kag landslide nga tuga sang malain nga panahon dala sang bagyo nga Agaton.
Inia ng ginpahayag ni Ms. Joremae Balmediano-Officer in Charge sang OCD-12 sa panayam sang Bombo Radyo Koronadal.
Suno kay Balmediano, nagikan ang mga pamilya nga apektado sa mga probinsiya sang North Cotabato, Saranggani, General Santos City , South Cotabato kag Sultan Kudarat.
Kabahin sang nasambit nga mga pamilya ang na-displaced kag nagapabilin karon sa pila ka mga evacuation center samtang ang iban yara sa tagsa nila ka mga himata.
Sa pagkamatuod, may pre-emptive evacuation nga ginpatuman man sang nagligad nga inadlaw sa kasagsagsan sang pagpanalasa ni Bagyong Agaton.
Magluwas sini, may naguba man nga dalan kag pila ka mga puluy-an nga nangin apektado sang mga naguba nga dalan kag apektado nga mga puluy-an bangud sa pagkatiphag sang duta.
Sa subong, nagapadayon pa ang assessment sang Office of the Civil Defense Region 12 sa kabug-usan nga damyos nga ginbilin sang kalamidad matapos nga magbalik na sa normal ang panahon sa Socsksargen.
Apang, sa pigak sang normal nga pagbalik sang panahon, padayon man ang pagpahanumdom sang OCD 12 kag pila ka ahensiya sang gobyerno nga magpabilin nga alerto kag vigilante sa tion nga liwat magbubo ang ulan.
