KORONADAL CITY- Malipayon nga gin deklarar sang pamunuan sang South Cotabato Rehabilitation and Detention Center (SCRDC) ang pagkanegatibo sang tanan nga mga Persons Deprived Of Liberty (PDLs) sa sulod sang pasilidad sa illegal nga druga.
Sa interview sang Bombo Radyo Koronadal kay Warden Lory Celeste sang South Cotabato Rehabilitation and Detention Center (SCRDC), gin kumpermar sini nga maga abot sa 1,065 ka mga PDLs ang ginpaidalom sa drug testing halin sang Abril 5 tubtub Abril 8 2022 sa diin lunsay wala na sang may nag positibo sa tanan nga gin tests.
Dugang pa sang opisyal, ginhiwat ang massive drug testing sa mga inmates bangud sa mga alegasyon nga may mga padayon sa gihapon nga naga pasulod sang illegal nga druga sa pasilidad.
Ginpahayag pa sang opisyal, tuyo sang ila nga talatapan nga lantawon ang nauna na nga gin promisa sang mga inmates nga indi na sila magpasulod sang illegal nga druga sa pasilidad kag nag pirma sa isa ka kasulatan nga ila man nga gin permahan nga maga kooperar sa mga patakaran sang Jail.
Sa karun kampante na ang SCRDC nga ipahayag nga wala na gid man sang naga usar sang druga sa jail pinaagi sa manami nga resulta sang mga tests.
