KORONADAL CITY – Naglab-ot sa onse ka mga katapu sang New People’s Army (NPA) ang boluntaryo nga nagsungka sa mga otoridad bangud sa pressure tuga sang wala untat nga operasyon sang mga otoridad.
Suno kay Lt.Col. Zandro Alves, 5th Special Forces Battalion commander, ang mga nagsungka nga rebelde ang miyembro sang NPA Guerilla Front 73 kag Musa nga nagahulag sa tri-boundary sang South Cotabato, Sarangani kag Sultan Kudarat.
Dugang pa sang opisyal nga napilitan nga magsungka ang mga ini bangud sa wala untata nga operasyon kag community outreach program nga ginalunsar sang lokal nga gobyerno sa mga malayo nga komunidad.
Nagdesisyon nga magsungka ang mga rebelde nga NPA agud nga makabenepisyo sa programa sang gobyerno sandig sa direktiba ni Pangulong Rodrigo Duterte nga tuldukan na ang problema sang local communist insurgency.
Suno naman sa mga NPA surrenderees nga nagahuyang na ang suporta sang masa sa rebelde nga grupo rason nga nagdesisyon sila nga bayaan ang komunista nga pagpakigbato sa gobyerno.
Kaupod man nga ginsungka sang mga ini ang mga matag-as nga kalibre sang armas luthang nga ginalakipan sang Browning automatic Rifle, M1 Carbine rifle, tatlo ka M-79 grenade launcher kag isa ka .45 cal. Pistol.
Nagbaton naman sang P10,000 cash assistance gikan sa lokal nga gobyerno ang mga nagsulungka.
