KORONADAL CITY – Naguba ang isa ka puluy-an makaligad nga gin-arado sang isa ka dump truck sa bahin sang Purok Bagong Lipunan, Brgy San Isidro, Koronadal City.
Ini ang ginkumpirmar ni Manong Cris Gabato , nagapanag-iya sang puluy-an, sa interview sang Bombo Radyo Koronadal.
Suno kay Gabato, naga prepar lamang sila sang dyutay kuntani nga salo-salo sa ila nga balay, kaupod ang 5 pa ka mga himata sini sang natabo ang insidente.
Hinali lamang suno pa nga nag-isol ang isa ka dumptruck nga ginausar sang ginapahimuan sang hollowblock bangud ginpraktisan ini sang drayber.
Dugang pa sini, posible nga natapakan sang wala na ginhingadlan pa nga persona ang accelerator sa baylo nga brake agud nga magpundo ang salakyan.
Nag-amat-amat suno pa ka isol ang salakyan kag nag-igo sa ila nga puluy-an, kag bangud himo sa light materials lamang ini, na tumba kag nawasak ang balay kun sa diin naipit ang 2 ka tawo sa sulod.
Maswerte nman nga wala sang mga kritikal kun diin nagapaayo na ang 2 ka persona nga naipit kag napilasan sa amu nga hitabo
Sa subong, nagaapela ang pamilya Gabato sang bulig sa liwat nga pagpatukod sang ila nga narumpag nga puluy-an.
Nagapanawagan man ini sang bulig sa mga opisyal sang gobyerno agud nga masuportahan ang ila nga liwat nga pagbangon.
