KORONADAL CITY – Ginbawian sang kabuhi ang isa ka CAFGU nga NPA surenderee matapos nga ginluthang-patay sang anay nga mga kaupdanan sa banwa sang T’boli, South Cotabato.
Ini ang ginpahayag ni PMaj. Irish Parangan, hepe sang T’boli PNP sa interbyu sang Bombo Radyo Koronadal.
Suno kay Parangan, nagluntad ang insidente sa Brgy. Datal Dlanag kun diin ginkilala ang biktima nga si Adam Daw, yara sa legal nga edad kag residente man sang nasambit nga lugar.
Sandig sa imbestigasyon, nagapahuway lamang ang suspek sa iya nga puluy-an sang ginsulod sang suspek nga nagpakilala nga si Ka George, miyembro sang Front 73, Sparrow Unit kag pila ka mga kaupdanan sini nga armado sang matag-as nga kalibre sang armas luthang.
Nagpalagyo pa si Daw agud nga indi mapatay apang ginbalabagan ini sang mga kaupdanan ni Ka George kag ginluthang.
Nakaangkon sang igo sang bala sa nagkalain-lain nga bahin sang iya nga lawas ang biktima nga gintunaan sang gilayon sini nga kamatayon.
