KORONADAL CITY – Nahulog sa kamot sang mga otoridad ang isa ka ginapatihan nga isa ka bomb courier sa Brgy Sulit,banwa sang Polomolok ,South Cotabato.
Ini ang ginkumperma ni PLt.Redin Cuevas sang Polomolok PNP sa interview sang Bombo Radyo Koronadal.
Suno kay Cuevas, maga serbi kuntani sang warrant of arrest ang mga otoridad sa isa ka suspek sa kaso sang murder, sang hinali nga na-ispatan sang mga otoridad ang isa ka makaduluda nga persona nga may ara sang backpack.
Gin palapitan sang mga otoridad ang persona nga ginkilala nga si Boni Lingay Sueb,22 anyos ,may asawa kag residente sang Purok 6 Brgy Lapu, Polomolok, South Cotabato.
Nakuha sa sulod sang bag sang suspek ang pila ka mga ginapatihan nga IED components nga ginakalakipan sang 1 ka unit sang unit rifle grenade with plastic improvised container, nagkalain-lain nga wires , remote kag mga subersibo nga mga dokumento nga makitaan sang pag kreer sang improvised explosive devices.
Gina-angot naman sang mga otoridad ang naarestar nga suspek sa mga katapo sang Daulah Islamiyah nga isa man sa mga ginabantayan sang mga otoridad sa nasambit nga lugar.
Sa subong, magapangatubang sang kaso nga paglapas sa RA 9156 kag RA 11479 ukon Anti-Terrorism Act of 2020 ang nadakpan nga suspek.
