KORONADAL CITY – Magalab-ot sa 90 ka mga pamilya ang temporaryo nga ginpabakwit padulong sa Barangay Hall sang New Iloilo, Tantangan ,South Cotabato bangud sa pagbaha nga tuga sang 7 ka oras nga pagbubu sang mabaskog nga ulan.
Ini ang ginkumpirmar ni Benhur Peñol , Barangay Chairperson sang New Iloilo,Tantangan,South Cotabato sa interview sang Bombo Radyo Koronadal.
Suno sa opisyal, ginpabakwit ang pila ka mga pamilya sa iya nga barangay sa kabalaka nga magsaka pa ang lebel sang tubig sa nasambit nga lugar,madasig naman nga gintagaan sang improvised tent sang Munincipal Disaster Risk and Management office ang mga residente nga nag tenir sa sulod sang barangay gym .
Dugang pa sang opisyal, sa inisyal man nga datos nga iya nga uyat, magalab-ot man sa 15 ka hektarya sang mga pananom ang nalunupan sang tubig baha.
Wala man sang untat ang bulig sang Bureau of Fire Tantangan , Munincipal Disaster Risk and Management office kag mga opisyal sang Barangay sa pagsabat sang mga kinahanglanon sang apektado nga mga residente.
Sa subong naga amat-amat naman nabaw ang lebel sang tubig sa mga nabahaan nga mga residente kag naga hinay-hinay naman balik ang mga ini sa ila nga tagsa tagsa ka mga puluy-an.
