KORONADAL CITY-Patay ang isa ka persona samtang 5 ka iban pa ang pilason makaligad nga naigo ang mga ini sang kilat sa bahin sang Purok Makugihon, Brgy Upper Klinan Polomolok South Cotabato.
Ginkilala ni PMaj. Randy Apostol, Deputy Chief of Police sang Polomolok PNP ang mga biktima nga amu sanday Rachel Aliviado Cabisares; Renaldo Aliviado Adaron; Edwin Cabisares Pando; Kessia Cabisares Falsis; Carlwyn Cabisares Falsis kag Rolando Alcuizar Blase.
Sandig sa imbestigasyon nga ginhiwat sang mga kapulisan, naga kay-o sang payag-payag ang mga biktima sa nasambit nga lugar samtang naga bubu ang mabaskog nga ulan sang hinali nga nagpanaog halin sa kahawaan ang kilat kag nag-igo sa mga ini.
Naka-sustenir sang pilas sa nagkalain-lain nga bahin sang kalawasan ang mga biktima kabanganan nga gindangat ang mga ini sa pinakamalapit nga balay-bulungan para sa medikasyon apang gin deklarar nga dead-on-arrival ang isa sa mga biktima nga si Edwin Cabisares Pando bangud sa natam-an ini sa pag-igo sang kilat.
Nagapadayon naman ang pagpaayo sang 5 ka mga biktima sa balay-bululngan.
