KORONADAL CITY – Nagapanawagan sa karon sang bulig ang pamilya sang isa ka 13-anyos nga rape victim nga madakpan gilayon ang 59-anyos nga suspek nga naglugos sa biktima sa banwa sang Norala, South Cotabato.
Sa interbyu sang Bombo Radyo Koronadal kay PCpl Brenda Barrientos sang WCPD-Norala PNP, ginreport sang pamilya sang biktima ang natabo sa kapulisan matapos madiskubrihan sang iloy sang menor de edad nga nagadala na ini kag ang ginatudlo nga naglugos sa iya sang makapila ka beses amo ang ginakilala nga lolo sini.
Suno kay Barrientos, nagapuyo sadto ang biktima sa iya nga lola nga live-in partner sang suspek apang ginkuha ini sang iya matuod nga ginikanan sang napatay na ang lola sini.
Apang, ginakuha suno pa gihapon ini sang suspek kag ginaupod sa kun sa diin ini magpadulong.
Sang bulan sang Agosto 2020 pa nagsugod nga himuslan sang suspek ang biktima tubtob nga matalupangdan sang iya pamilya nga masami ini nga tulala.
Gilayon nga ginpaidalom sa check-up ang biktima kag natukiban nga buntis ini sang lima na ka bulan.
Sang mapahibalo na sa kapulisan sang pamilya ang natabo gilayon man nga nagpalagyo ang suspek nga sa subong ginapangita na.
