KORONADAL CITY – Yara na sa estable nga kondisyon sa subong ang lima ka bulan nga lapsag matapos nga mahulog kag malumos sa sapa sa Purok New Leganes, Barangay Zone 1, Koronadal City.
Sa interbyu sang Bombo Radyo Koronadal kay Lola Kristine, lola sang lapsag, nakibot kag nahadlok na lamang suno pa ang iloy sang biktima sang makit-an nga wala na ang bata sini sa iya tupad nga nagakatulog samtang mabaskog ang pagbubo sang ulan.
Suno kay Lola Kristine, mismo nga iloy sang bata ang nakakita nga yara na ini sa tubig sang sapa matapos maglusot sa gabok nga dingding sang ila panimalay nga yara naman sa kilid sang sapa.
Gilayon nga naghingyo sang bulig ang pamilya sa ila mga kaingod kag narescue naman ang lapsag.
Halos 30-minutos man ang ginhimo nga pagpangita sa lapsag tubtob nga nasapwan ini.
Gintinguhaan nga ma-revive ang lapsag kag gindala sa isa ka pribado nga hospital sa siyudad kag nagapaayo na sa subong.
Sa subong nagapanawagan sang bulig-pinansyal sa lokal na gobyerno ukon sa sin-o man nga may mahumok nga kasing-kasing ang pamilya agud ibayad sa pagpabulong sa biktima.
