KORONADAL CITY – Tuman nga ginakadismaya kag ginakasubo sang pamilya sang isa ka ginaaligar nga drug suspect ang nangin batasan kag ginpatigayon nga operasyon sang mga katapo sang Regional Police Drug Enforcement Unit (RPDEU) sa Prk. Mabuhay, Brgy. Magsaysay, Koronadal City.
Sa interbyu sang Bombo Radyo Koronadal kay alyas Nora, ginkakibot na lamang nila ang suno pa drug operations sang kapulisan sa ila panimalay kun sa diin ginpaguwa sila kag target ang iya bata nga si Dimson Togonon takna ala-1 sang kaagahon.
Ginsipa suno pa sang RPDEU ang ila pwertahan kag ginpaguwa sila.
Ginpahapa suno pa ang iya umagad kag makaligad ang pila ka minutos nakabati na sila sang mga lupok sang armas.
Suno kay ginang Nora, iya nga ginakalain sang buot nga makaligad suno pa nga ginpatay sang mga ini ang iya umagad, ginbutangan suno pa ang bag sang iya nga apo sang shabu, armas, kag ginkuha ang cellphone nga ginausar sang mga apo niya sa online classes, kag kwarta sa pambayad sa uma.
Ginpahog man siya kun sa diin pasakaan siya sang kaso kun indi sya maghipos angot sa natabo.
Samtang ginpakigbahin sang isa sa mga bata sang ginaaligar nga drug suspect kun ano ang natabo sa pagkostudiya kag pagpatay sa iya nga amay.
Suno kay alyas Denden, pwersahan suno pa nga ginaabrihan sang mga pulis ang ila nga puloy-an pinaagi sa pagsipa sa pwertahan kag sang nakit-an nila ang iya amay, ginpahapa nila ini samtang yara sa tiles antes suno pa nga ginbalhin sa foam nga ila ginatulogan, samtang ginapaguwa sila sa puloy-an.
Nagahilibion man ini bangud ginasinggitan suno pa ang iya amay kag ginasipa-sipa daw.
Sa subong ila nga pagahisgotan kun magasang-at sila sang kaso batok sa raiding team bangud sa nasambit suno pa nga operasyon.
