KORONADAL CITY – Rido ang isa sa mga ginalantaw nga anggulo sang mga kapulisan sa pagpangluthang patay sa isa ka lalaki sa banwa sang Tupi, South Cotabato.
Ginkilala ang nasambit nga biktima nga si Guapi Sulaiman, 25 anyos, isa ka empleyado sang isa ka grocery store kag residente sang Sitio Bulawan, Brgy. Polonuling sang nasambit nga banwa.
Sa interbyu sang Bombo Radyo Koronadal kay PMaj. Virlen Pampolina, ang hepe sang Tupi PNP, nagaguwa sa ila imbestigasyon nga samtang pauli na ang biktima halin sa iya ginaobrahan sa banwa sang Polomolok sakay sang iya tricycle kag pag-abot sa Crossing Basak, Brgy. Kablon diri na siya ginluthang sang wala pa nakilal-an nga mga suspek.
Nakaangkon sang madamo nga bala sa lawas si Sulaiman nga nangin kabangdanan sang iya hinali nga kamatayon.
Sa subong suno kay Pampolina, nagapakig-angot na sila sa Polomolok PNP agud mapadasig ang dalagan sang imbestigasyon kag matumod ang mga responsable sa nasambit nga krimen.
Posible suno pa nga may nakaengkwentro sa pihak nga barangay ang nasambit nga biktima rason nga ginhimo ang nasambit nga pagpangluthang.
