KORONADAL CITY- Nakapagkit na naman sang panibag-o nga COVID-19 positive case ang banwa sang Banga, South Cotabato.
Ini ang ginkumpirmar ni Mayor Albert Palencia sa interbyu sang Bombo Radyo Koronadal.
Suno kay Mayor Palencia, isa ka 32-anyos nga manunudlo ang nagpositibo nga nagatudlo sa isa ka buluthoan sa General Santos City.
Nakasulapo suno pa sini ang isa ka 58-anyos nga manunudlo nga una nga nagpositibo sa virus.
Sang nakaligad nga Agosto 2 nagpuli ini sa banwa sang Banga kag nagpabilin sang pila ka adlaw tubtob sa nagbalik sa General Santos City sadtong Agosto 15.
Bangud nangin symptomatic ang nasambit nga pasyente, gilayon ini nga gindala sa COVID hospital.
Sa subong, nagapatigayon na sang contact tracing ang Municipal Health Office kun sa diin duha ka barangay na ang ila ginatutokan sa kasamtangan.
