KORONADAL CITY – Ginpaidalom sa 14 araw nga localized lockdown ang pila ka barangay sa banwa sang Polomolok, South Cotabato kasunod sang padayon nga pagdamo sang kaso sang covid-19 sa ila lugar.
Sa interbyu sang Bombo Radyo Koronadal kay Polomolok Mayor Honey Lumayag-Matti, ini makaligad ginpaguwa sini ang executive order no. 37 series of 2020 kun sa diin kalakip sa igapaidalom sa localized lockdown ang mga barangay sang Cannery, Poblacion, Silway 8, kag Magsaysay; Prk. 1 kag 4 sa
Brgy. Koronadal Proper kag Prk. Cassava sa Brgy. Maligo sa nasambit nga lockdown.
Nag-umpisa ang nasambit nga lockdown sang Agosto 19, kag magatakop ini sa Setyembre 2.
Dugang sang alkalde, yara sa kapin 5,000 man ang ila gina-monitor nga close contacts sang anom nga mga confirmed cases, magluwas pa sa pito ka symptomatic patients nga padayon nga ginapaidalom sa isolation kag ginkuhaan sang swab test.
Nagalaum si Mayor Matti nga malampuwasan nila ang ini nga pagtilaw kag nagapanawagan sa mga pumuluyo nga mangin mabakod lamang kag magtuman sa mga pagsulondan sa mga pagsulondan sa paglikaw sa covid-19 virus.
