KORONADAL CITY – Gin-anunsyar ni Mayor Albert Palencia ang pagpaidalom sa 5 ka adlaw nga total lockdown sa Sitio Awal, Barangay Lamba, Banga South Cotabato umpisa subong, Hulyo 14 tubtob Hulyo 18, 2020.
Ini matapos nga natukiban ang pag-positibo sa COVID-19 sang isa ka 31 anyos nga babaye nga repatriated OFW gikan Kuwait nga nagpauli sa nasambit nga lugar kag wala magsunod sa 14 diyas nga quarantine protocol.
Sa interbyu sang Bombo Radyo Koronadal kay Mayor Albert Palencia, ginpahayag sini nga wala pa man matapos ang pagpaidalom sa quarantine sang nasambit nga ROF, naguwa ini sa ila puluy-an, nagpakasal kag naglagaw pa sa banwa sang Surallah.
Sa subong yara sa 26 ka tawo na ang ginpaidalom sa quarantine nga may personal-contact sa nasambit nga ROF kaupod na ang bana kag bata sini.
Ginpasalig man sang alkalde nga magapanghatag sila sang ayuda sa mga residente nga apektado sang lockdown.
Magapadayon man ang contact tracing sang Municipal Health Office kaupod ang Barangay.
Pagatun-an man sang LGU-Banga ang pagpasaka sang kaso sa nasambit nga ROF bangud sa ginhimo sini.
Madumduman nga sang tinalikdan nga adlaw sandig sa ginpaguwa nga data sang DOH-12 yara sa pito ka kaso ang nadugang sa probinsiya sang South Cotabato kun diin 3 diri ang nagpauli sa banwa sang Banga kag isa sa ila ang nasambit nga ROF.
