KORONADAL CITY – Desidido nga paimbestigaran ni South Cotabato Governor Reynaldo Tamayo Jr. ang pagkaulamid suno pa sang pila ka mga opisyal sa joyride sa bug-os nga rehiyon 12.
Ini makaligad gin-istoryahan ang post sang gobernador sa iya social media account nga pila ka mga opisyal sang gobyerno ang nag-intra sa nasambit nga biyahe kalakip suno pa si 2nd District Representative kag Deputy Speaker for Mindanao Ferdinand Hernandez.
Sa nasambit nga post makit-an ang pagbiyahe sang mga ini sa siyudad sang Koronadal, Tacurong, Cotabato; Lebak, Palimbang kag Kalamansig sa Sultan Kudarat; Maitum kag Kiamba sa Sarangani Province; General Santos City kag pabalik sa Koronadal.
Suno kay Tamayo, luyag niya ini nga imbestigaran agud mahibaloan kun matood ang nasambit nga alegasyon bangud makabig nga insulto ini sa iban nga mga provincial governors nga nagapatuman sang layi agud masiguro ang kaluwasan sang mga pumuluyo batok sa covid-19 pandemic.
Kuntani ginpaminsar sang mga ini paano sila makabulig agud indi na magdugang sa problema nga ginakaatubang sang gobyerno probinsyal.
Ginpaandaman niya man ang mga ini nga indi siya pagtilawan, kadungan sa apela nga makigbuylog ang tanan agud matapos na ang pandemiya nga ginakaatubang.
Samtang abri naman ang Bombo Radyo Koronadal kay Cong. Hernandez agud makapaathag sang iya bahin.
