KORONADAL CITY – Kasubong nga nakaangkon sang pagkontrahanay ang Koronadal City government kag South Cotabato Provincial Government kaangot sa pagpatuman sang covid-19 ID contact tracing system sa probinsya.
Sa interbyu sang Bombo Radyo Koronadal kay South Cotabato Gov. Reynaldo Tamayo Jr., ginpaathag sini nga wala sang ginabayolar nga layi kaangot sa privacy sang isa ka tawo ang nasambit nga sistema kun sa diin kinahanglan lamang ang pangalan, address kag QR code nito nga nakabutang sa kasubong sa isa ka calling card kag kinahanglan nga i-scan.
Gindugang man sini nga ang ang rason nga nagpaguwa sang executive order amo ang mahan-ay ang contact tracing sa isa ka lugar.
Nagakabalaka man ini nga kun indi ini gilayon nga mapatuman, posible nga indi na ma-kontrol ang pagdamo sini kun makasulod sa Koronadal City.
Una na nga nagpahayag si Koronadal City Mayor Eliordo Ogena sa pagdis-ayre sa nasambit nga plano sa pahayag nga mabayolar sini ang privacy sang isa ka tawo bangud sa nasambit nga sistema.
Mas maayo suno pa nga umpisahan ang contact tracing sa persona nga ginadudahan nga may kaso sang covid-19.
