KORONADAL CITY – Ginapabugal sang South Cotabato ang duha ka lab assistants nga kabahin sa validation team sa pag-manufacture sang naimbento nga locally-made testing kit nga mahimo mausar sang mga medical frontliners para sa testing sang covid-19.
Sa eksklusibo nga interbyu sang Bombo Radyo Koronadal kay Kris Pineda Punayan nga tumandok sa banwa sang Norala, kaupod niya ang kasimanwa nga si Sheila Mae Araiza sa nasambit nga proyekto.
Ginpakigbahin ni Punayan, nagaumpisa ang proseso sa sample collection, kag ginasundan sang extraction, ginasagulan dayon sang mga kemikal agud matumod ang virus antes ipaagi sa machine.
Ang nasambit naman nga makina ang magahatag sang resulta kun sa diin may mga pagsulondan sila nga ginasunod agud matumod kun positibo ukon negatibo ang isa ka tawo.
Suno kay Punayan, sa subong sila lamang ang nagapatigayon sang study sang locally made test kits agud mausar sang mga kasimanwa.
Ang nasambit nga imbentor sang mga produkto amo si Dr. Raul Destura nga amo ang Deputy Executive Director sang Philippine Genome Center.
Madumdoman nga nag-isyu ang Food and Drug Administration sang certificate of product registration para sa GenAmplify™ COVID-19 rRT-PCR Detection Kit nga gin-manufacture sang Philippines National Institutes of Health, the Philippine Genome Center, kag ang manufacturer nga The Manila HealthTek Inc.
Nagadugay sang kapin duha kag tunga ka oras antes magguwa ang resulta kag nagabalor ini sang P1,800 tubtob P2,500 kada test.
