KORONADAL CITY – Gin-ako ni Eleonora Vergara, isa ka Pinay nga pumuluyo sa Milan, Italy nga kasubong nga nawad-an na sila sang paglaum kun ano ang ila pagahimoon angot sa pamahog sang coronavirus disease sa nasambit nga pungsod.
Sa ekslusibo nga interbyu sang Bombo Radyo Koronadal kay Vergara, gin-ako sini nga indi na sila makapaminsar sang maayo sa nasambit nga sitwasyon labi na nga wala sila sang obra kag wala sila makabalo kun san-o sila makabuhi sa sini nga sitwasyon.
Ginpahayag man sini nga wala na sila nagapamati sa mga balita agud indi madugangan ang ila nga stress.
Sa pihak nga bahin, ginpakigbahin sini nga apesar lockdown sa nasambit nga pungsod, padayon sa gihapon ang operasyon sang pila ka mga pabrika mangin ang mass transportation.
Bangud sini, madamo ang mga nagareklamo ngaa indi gilayon nga ipaidalom sa total lockdown ang bug-os nga pungsod, sa baylo sa entry kag exit points lang sang Italy.
Nagpaandam man ini sa mga pumuluyo diri sa Pilipinas nga kun indi magahalong ang aton mga kasimanwa diri, mangin kasubong man sa madangtan sang Italy ang aton pungsod.
