Ginpahayag sang pila ka OFW halin sa SOCSKSARGEN Region nga yara subong sa Bahrain ang ila matuod nga kahadlok bangod sa nagalala nga tensyon sa nasambit nga pungsod.
Ini ang ginpakigbahin ni Bombo Correspondent Cecile Provido, isa ka OFW halin sa Maibo, Tantangan, South Cotabato nga napulo na ka tuig nagatrabaho sa Bahrain, sa exclsuive interview sang Bombo Radyo Koronadal.
Suno kay Provido, indi na mapunggan ang tingog sang mga sirena kasunod sang mga pagsabog sa lima ka nagkalain-lain nga lugar kaina sang kaagahon.
Bangud man sa pagkasunog sang isa sa pinakadaku nga planta nga naga-supply sang kuryente sa malalapad nga mga syudad, nag-abiso ang gobyerno sang Bahrain sa tanan nga residente, lakip ang kapin 56,000 ka mga OFW, nga maghanda sang solar lights, emergency lights kag generators bangod sa hulga sang nagapalang-abot nga total blackout.
Ginhulagway pa gid ni Provido ang kahadlok nga iya ginabatyag ilabi na kay isa na siya ka dekada sa amo nga pungsod pero subong lang siya nakaagum sang gera.
Nagasiling siya nga masuwerte siya bangod ang iya employer isa ka retired Ambassador. Bisan may kahadlok, ginpili anay ni Provido nga magpabilin sa Bahrain bangod sa kahadlok nga wala siya sang maabtan nga obra sa Pilipinas.
Sa pihak sini, ginpahayag niya nga may mga reklamo ang iban nga mga Pinoy batok sa Philippine Embassy bangod sa indi kuno pagtubag sang ila mga mensahe para sa repatriation.
Nanawagan man si Provido sa gobyerno nga buligan sa mas madali nga tion ang mga OFW didto nga gusto na magpauli sa Pilipinas.
