KORONADAL CITY – Personal nga nagpadulong sa Bombo Radyo Koronadal ang bana sang isa ka OFW nga taga-South Cotabato kag kasamtangan nga yara sa Saudi Arabia nga nagamasakit agud maghingyo sang bulig nga makapauli ini gilayon.
Ginkilala ang OFW nga si Pinky Alborote, isa ka domestic helper sa Tabuk, Saudi Arabia kag nagasuprer sang malala nga balatian sa subong.
Suno sa iya bana nga si Jerson Alborote, nga residente sang Barangay Dajay, Surallah, South Cotabato, madamo nga ahensiya sang gobyerno na ang ila napadulungan agud magpangayo sang bulig ilabi na ang agency sini apang kasubong nga wala sang aksiyon.
Ginpahayag pa ni Jerson nga sa sini nga tinion nagakabalaka na sila sa sitwasyon sang iya nga asawa bangud ginatrangkaso ini, wala na sang gana nga magkaon, nagasuka kag naga ihi suno pa sang dugo.
Nakapakig-angot naman ini sa agency sang iya nga asawa apang daw kasubong nga kadugay nga maaksyunan ang sitwasyon sang misis sini.
Suno sa agency nga kinahanglan pa nga magpakitluoy sila agud nga papulion ini bangud indi ini pag-irelease sang iya nga employer tubtob nga indi makakita sang igatal-os sa iya nga asawa.
Nadugangan pa ang ila problema sa pagkadelatar sa pagproseso nga makapauli ang iya asawa bangud sa COVID-19.
Kadungan sini nagapanawagan sang bulig sa gobyerno sang pungsod, OWWA kag POEA ang pamilya Alborote agud makapauli ang nasambit nga OFW.
