KORONADAL CITY – Desidido ang Koronadal city government nga pasakaan sang kaso ang duha ka lady guard sang isa ka commercial establishment nga nagabaligya sang peke nga Occupational tax ID kag health certificate.
Sa interbyu sang Bombo Radyo Koronadal kay City treasurer Marloun Gumbao, masobra P10 milyon ang mahimo nga madula sa city government sa tion nga wala natukiban kag magpadayon ang pagpanunto nga ni.
Ginpabati-batian man sini ang mga suspek nga wala na ginhingadlan pa nga nagabinutig lamang sa pagpahayag nga wala nila makilala ang mastermind sa tion nga nagaremit na sila sang kwarta.
Samtang, ginpanginwala naman sang security agency nga may kahilabtanan sila sa modus sang duha nila ka mga security guards nga nadakpan sa entrapment.
Ini ang ginpaathag ni Rodrigo Lumarda, ang operations manager sang McArthus Security Agency sa ekslusibo nga interbyu sang Bombo Radyo Koronadal.
Suno kay Lumarda, wala siya sang ihibalo sa ginhimo sang duha apang ginpahayag sini nga antes pa man nabuyagyag ang modus, nagfile na sang leave ang isa sa mga guwardiya kag wala na ini nag-report liwat sa trabaho.
Nahibaluan nga gintagaan lamang sang 10 ka adlaw ang mga suspek nga ibuyagyag ang ila nahibaluan sa modus agud indi sila mapasakaan sang kaso.
Posible man nga hibaluon kun may kahilabtanan sa sin-u-man nga empleyado sang City government ang modus nga nabuyagyag.
