KORONADAL CITY – Tuman ang trauma kag kahadlok ang nabatyagan sang mag overseas Filipino workers sa siyudad sang Nakhon Ratchasima sa pungsod Thailand kasunod sang maduguon kag wala untat nga pagpangluthang sang isa ka suldado sa Terminal 21 mall antes ini napatay sang mga otoridad.
Nahibaloan nga base sa pinakaulihi nga datos, nagsaka na sa 29 ang napatay samtang 57 iban pa ang napagkit nga pilason.
Suno kay Bombo international correspondent Reymark Alvarez, kasamtangan nga naka-shutdown ang siyudad kasunod sang panghitabo.
Samtang ginsaysay naman ni Bombo international correspondent Ana Mae Boja, isa ka manunudlo sa nasambit nga pungsod, nga magluwas sa matag-as nga mga kalibre nga armas nga iya dala, ginahaboyan man suno pa sang 32 anyos nga suspek nga si Sgt. Jakrapanth Thomma sang granada ang sin-oman nga makit-an niya.
Dugang ni Boja, magluwas sa novel-coronavirus nga kasamtangan nga ginapangatubang sang nasambit nga pungsod, nagdugang pa sa ila problema ang mass shooting sang nasambit nga suldado.
Ginpakigbahin man sini nga luwas ang mga kasimanwa naton apesar pila sa mga ini ang na-trap sa nasambit nga mall kag nagtago agud makaluwas sa pagpangluthang sang suspek antes na-rescue sang mga nagresponder nga mga otoridad.
Ginasiling nga away sa duta ang ginalantaw nga motibo sang mga otoridad rason nga ginhimo ni Thomma ang nasambit nga pagpangluthang.
