MLANG, NORTH COTABATO – Ginkalipay sang nilibo ka mga earthquake survivors ang pagbisita ni Pangulong Rodrigo Duterte sa probinsiya sang North Cotabato kaina sang udto.
Sa eksklusibo nga interbyu sang Bombo Radyo Koronadal kay Abraham Contayoso, secretary to the mayor sang banwa sang Tulunan, North Cotabato, nahatagan sang paglaum ang mga earthquake survivors sa pagbisita sang pangulo.
Nabatyagan suno pa sang mga residente sa North Cotabato partikular sa mga banwa sang Mlang, Tulunan, Makilala kag Kidapawan City ang simpatiya sang isa ka amay labi na kag dako nga bulig man ang dala sini.
Ang ginpatigayon nga humanitarian mission ni Pangulong Duterte antes matapos ang tuig ang naghatag sang kabuhi sa mga residente nga apisar masubo bisan paano nadula ang kakulba kag trauma sa sunod-sunod nga lindol.
Nahibaluan nga sa pagbisita ni Pangulong Duterte sa Mlang National High School naghatag ini sang food aid kag financial assistance sa mga biktima sang linog sa nasambit nga lugar.
Kadungan sini, ginapasiguro sang pangulo sa mga pumuluyo sa North Cotabato nga magabulig ang gobyerno sa panginahanglanon sang mga ini tubtob makabangon sa impact nga dala sang nasambit nga kalamidad.
