KORONADAL CITY – Nagapadayon ang imbestigasyon sang Surallah PNP angot sa nagluntad nga insidente sang pagpangluthang sa nasambit nga banwa nga ginkapatay sang isa ka lalaki.
Ginkilala ang nasambit nga biktima nga si Paulo Sagra, 28 anyos kag residente sang Brgy. Zone 4 sa nasambit nga banwa.
Suno sa imbestigasyon, nagluntad ang insidente antes mag-alas 12 sang kaagahon sadtong Sabado sang gilayon suno pa nga ginluthang si Sagra sang ginapatihan nga riding in tandem kun sa diin ginluthang ini sa ulo nga gintunaan sang hinanali sini nga kamatayon.
Samtang milagro naman nga nakaluwas sa kamatayon ang isa ka crew sang convenience store nga si alyas Nathan kun sa diin ginpahayag sini nga nagapanghaboy lamang siya sang basura sang mabatian niya ang mga lupok kag nag-agi ang nagtalang nga bala sa iya uniporme rason nga nabuslot ini apang wala man siya napilasan.
Narekober sa crime scene ang ginapatihan nga basyo sang kalibre 45 nga armas kag isa ka papel halin sa biktima nga ginapatihan nga residue sang ilegal nga droga.
Tubtob sa subong ginahibalo sang mga otoridad kun ano ang motibo sa nasambit nga pagpangluthang.
