TULUNAN, NORTH COTABATO – Yara na sa kustodiya sang mga otoridad ang tatlo ka lalaki nga ginatudlo suspek sa pagpanglugos sa isa ka 16-anyos nga estudyante sa banwa sang Tulunan, North Cotabato.
Suno kay Bombo Correspondent Jojo Gallo, nakita mismo sang nagapanag-iya sang isa ka swimming pool sa Barangay Sibsib sa nasambit nga banwa ang hitabo rason nga ginreport sini sa kapulisan kag nadakpan sa akto ang mga suspek.
Antes pa man ginguyod sang mga suspek ang biktima sa isa ka comfort room sa nasambit nga swimming pool, ginhubog anay sang mga ini ang biktima.
Nahibaluan nga hubog man ang mga suspek sang himuon ang krimen.
Hugot naman nga ginpanginwala sang mga suspek ang ginapasibangod sa ila apang may testigo nga nakakita sa mga ini.
Sa subong, ginapreparar na ang nagakaigo nga kaso batuk sa mga suspek.
