KORONADAL CITY – May ginahimo na nga time table ukon schedule ang lokal nga gobyerno sang Tulunan sa ila nabaton nga mga relief goods agud nga sarang ini nga madistribwer sa nga pumuluyo tubtob sa katapusan sang tuig.
Ini ang ginpahayag ni Abraham Contayoso, Secretary ni Tulunan Mayor Reuel Limbungan sa esklusibo nga interbyu sang Bombo Radyo Koronadal.
Suno kay Contayoso, madamo pa sang nabilin nga mga relief items nga nakastock apang ini ang ila na nga ginhimu-an sang schedule kun sano ipanagtag sa mga apektado sang linog sa ila nga lugar agud nga makalab-ot pa ang suplay tubtob sa Disyembre 31, 2019.
Sa pihak sini, padayon sa gihapon ang ila pagpalab-ot sang ayuda sang 7 ka barangay nga ginakabig ground zero sang magtay-og ang linog sang October 16, October 29 kag October 31, 2019 nga nagsentro sa ila nga banwa.
Nagapasalamat man ini bangud sa mga bulig nga mga naga-abot kun sa diin waay na ginatan-aw ang kultura kag relihiyon agud lamang makahatag sang donasyon sa na-apektuhan sang linog.
