KORONADAL CITY – Natalana nga ipalab-ot sang Provincial Government sang South Cotabato ang mga natipon nga bulig halin sa nagkalain-lain nga grupo kag indibidwal sa mga apektado sang linog sa probinsya sang North Cotabato.
Ini ang pinaagi sa talatapan sang South Cotabato Provincial Disaster Risk Reduction and Management Office ukon PDRRMO South Cotabato.
Sa esklusibo nga interbyu sang Bombo Radyo Koronadal kay PDRRMO Operations and Warning Chief Rolly Doane Aquino, ginpahayag sini nga igadul-ong nila sa mga apektado nga residente sa banwa sang Makilala kag Tulunan ang donasyon halin sa mga pumuluyo sang South Cotabato.
Suno kay Aquino, tuman nga makaluluoy ang sitwasyon sang nagbalakwit nga mga pumuluyo bangud naghimo na lamang ang mga ini sang kaugalingon nga mapasilungan pinaagi sa pag-usar sang mga trapal nga nagaserbi nila nga temporary shelter bangud madamo sang mga litik ang mga gym nga magaserbi kuntani nga evacuation centers.
Bangud sini, hugot nga kinahanglanon sang mga pumuluyo ang mga tents agud nga mangin komportable man ang mga ini sa ila nga pagpahuway sa pihak sang natabo nga kalamidad.
Samtang ginpahayag ni Aquino nga padayon tubtob sa subong ang mga pagbaton nila sang bulig halin sa mga South Cotabateños agud nga ipadala sa mga quake-affected areas sa North Cotabato.
Suno kay Aquino abri ang ila nga opisina sa pagbaton sang mga donasyon kasubong sang pagkaon, tubig, panapton, cash kag iban pa nga sarang nga makabulig sa mga bakwit.
Ginhingyo man sini nga ang mga taga-South Cotabato nga maghugpong para sa pagbangon sang sitwasyon sang mga evacuees bangud sa asod-asod nga linog.
