KORONADAL CITY– Nagpanawagan na sang bulig ang lokal nga gobyerno sang Tulunan, North Cotabato kag mga pumuluyo sini bangud sa tuman ka dako nga danyos nga napagkit sa ila banwa makaligad ang pag igo sang Magnitude 6.6 nga linog kahapon sang aga.
Sa interbyu sang Bombo Radyo Koronadal kay Tulunan, North Cotabato Vice Mayor Maureen Villamor, yara sa masobra 1,700 ka pamilya na subong ang apektado kag nagapanawagan sang bulig kun sa diin partikular nga problema subong ang pagkaon, malimpyo nga tubig, temporaryo nga maistaran ukon tents kag ang mental health suppport sa mga naka eksperyensya sang trauma ilabi na ang mga kabataan.
Sa subong yara na sa masobra 200 aftershocks ang napagkit makaligad ang linog kun sa diin padayon ang pagbubo sang mga residente nga nagapalapit sa talatapan sang lokal nga gobyerno sang Tulunan agud magpangayo sang bulig.
Aminado naman ang LGU Tulunan nga limitado ang ila relief assistance para sa mga biktima kag nagahulat sila sang dugang nga bulig halin sa national government.
