KORONADAL CITY– Nagsaka na sa 2 ang ginbawian sang kabuhi makaligad pagtay-og sang magnitude 6.6 nga linog kaina sang aga sa Mindano kun sa diin sa Tulunan, North Cotabato ang nangin epicenter sini.
Ginkilala sang mga otoridad ang una nga napatay nga si Nestor Narciso, 61 anyos, residente sang Barangay General Paulino Santos, Koronadal City nga natabunan sang mga debris halin sa nagtiphag nga simbahan sa syudad.
Sunod naman nga ginbawian sang kabuhi sa South Cotabato Provincial Hospital si Melissa Moren, 25-anyos, residente sang Brgy Dumadalig, Tantangan, South Cotabato matapos nga maka-angkon sang malala nga pila tuga sang aksidente sa dalanon.
Yara sa national highway ang biktima sakay ang motorsiklo nga ginamaneho sang iya nga bana sang nabatyagan ang mabaskog nga linog.
Plano kuntani sang iya nga bana nga magpahigad apang wala sini nakit-an ang nagasunod nga salakyan bangud sa kahadlok sang mabaskog nga linog.
Samtang, ginpahayag naman ni Tulunan North Cotabato Municipal Engr. Emmanuel Fuerto nga nagapadayon ang ila nga assessment sa danyos nga ginbilin sang linog sa ila nga banwa kun sa diin 2 sa 5 classrooms ang naguba sa Daig Elementary School ang totally damage samtang halos 200 nga estudyante ang apektado nga gindala naman sa balay bululngan.
Napagkit naman ang isa suno pa ka empleyado sang gobyerno halin sa SibSib, Tulunan, North Cotabato nga naglukso halin sa 2nd Floor sang edifesyo samtang nagalinog.
Gilayon naman nga gindala sa pinakamalapit nga balay bululngan ang biktima.
Sa karon, kasubong nga ghost town na ang pila ka lugar sa South Cotabato kag North Cotabato matapos ang mabaksog nga linog nga ginsundan pa sang mabaskog nga aftershocks.
