Tension cracks sa banwa sang Lake Sebu, nagpadamo pa – Mayor

LAKE SEBU, SOUTH COTABATO – Mas nagdamo pa ang napagkit nga mga tension cracks sa banwa sang Lake Sebu, South Cotabato.
Sa esklusibo nga interbyu sang Bombo Radyo Koronadal kay Lake Sebu Mayor Floro Gandam, ginpahayag sini nga nadugangan pa ang masobra 300 nga mga una na nga napagkit nga tension cracks sa Brgy Ned sa nasambit nga banwa.
Suno kay Mayor Gandam, naglibot na suno pa ini sa nasambit nga barangay kag ginpahayag nga indi nalang tension cracks ang nakit-an apang mga sink hole na ang mga ini.
Yara na suno pa sa masobra 600 ang napagkit nga sink holes.
Nakigsapol naman ang alkalde sa mga Brgy Officials agud nga makahimo sang aksyon ilabi na ang may mga pila ka mga pumuluyo nga apektado sini..
Ginmanduan naman suno ni Mayor Gamdam sa Municipal Disaster Risk and Reduction and Management Council ukon MDRRMC nga magpangita sang lugar nga sarang marelocate ang mga residente nga mangin apektado.
Kaangot sini, natalana nga magbisita ang mga katapo sang Mines and Geoscience Bureau ukon MGB kag Department of Energy agud magpatigayon sang pagtuon sa sitwasyon sang Brgy Ned.