BAGUMBAYAN, SULTAN KUDARAT– Yara na sa kustodiya na sang mga otoridad ang mga ginatudlo nga suspek sa nagluntad nga pagpasigabong sa public market sang Isulan Sultan Kudarat makaligad ang ginpatigayon nga joint operation sa probinsya sang Sultan Kudarat.
Sa esklusibo nga interbyu sang Bombo Radyo Koronadal kay General Diosdado Carreon, Commander sang 6ID Philippine Army, naarestar na ang suspek nga si Hassan Akgun, isa ka Swedish National matapos ang follow up operation sang PNP kag AFP sa Bagumbayan, Sultan Kudarat.
Suno kay Carreon, ang nasambit nga dumuluong ang konektado sa ISIS Terror Group kag kaupdanan man sang 3 ka mga nauna na nga naarestar sa ginpatigayon nga checkpoint sa General Santos City kahapon.
Ginkumpirmar man sini nga si Akgun kag sanday Abiding Camsa, Normia Camsa kag Norsia Camsa ang responsable sa natabo nga pagpasigabong sa Isulan sang Setyembre 7.
Nahibaluan nga magluwas sa mga eksplosibo nga narekober sa mga suspek, nakuha man sang mga otoridad ang mga components sa paghimo sang IED.
Nagapanguna man suno pa ang foreign terrorist sa recruitment sang ISIS sa Mindanao.
Sa karon, ginapreparar na sang mga otoridad ang patong-patong nga kaso batuk sa mga suspek.
