Nagapadayon ang imbestigasyon sang Koronadal PNP angot sa nagluntad nga pagpangluthang nga natabo sa Prk. Abrenica, Brgy. GPS, Koronadal City subong lamang nga gab-i.
Sa report sang Koronadal City PNP, takna alas 8:20 sang gab-i sang pauli na ang biktima nga si Bryan Padua Togonon kaupod ang iya pamilya sakay sa puti nga Mirage Mitsubishi makaligad magbakal sang gatas kag antes magsulod sa ila balay, ginluthang sang mga wala nakilal-an nga suspek ang mga biktima.
Gilayon nga gindangat sa isa ka pribado nga ospital si Bryan kag ang bata sini nga si Nicolo Bryzon Togonon apang gindeklarar nga dead on arrival ang menor de edad samtang nagtaliwan naman si Bryan makaligad na-revive sa sulod sang 10 minutos bangud sa igo sa nagkalain-lain nga bahin sang iya lawas.
Narekober naman sa crime scene ang apat ka basyo sang kalibre 45 nga posible gin-usar sang mga suspek sa krimen.
Padayon pa nga ginahibalo sang Koronadal PNP ang motibo sa nasambit nga insidente.
