KORONADAL CITY – Yara sa kritikal nga sitwasyon sa subong ang isa ka lalaki matapos makapila ka beses nga lampusan sang suspek sa isa ka vulcanizing shop sa Upper Balmores St. Brgy. Sto. Nino, Koronadal City pasado alas 9 kaina sang aga.
Sa eksklusibo nga iterbyu sang Bombo Radyo Koronadal kay Manong Tony, tag-iya sang vulcanizing shop, naabtan na lamang sini ang biktima nga si Alyas Jerry nga duguan na matapos ang makapila ka beses nga paglampos sang tubo sa iya ulo sang suspek nga si Alyas Alex nga trabahante sang Sheilas Park.
Sandig sa report, nagkit-anay ang duha sa vulcanizing shop, nagbaisay tubtob naglab-ot sa paglampos sang suspek sang tubo sa biktima.
Ginaaligar nga babaye ang rason sang madalom nga away sang duha ka lalaki.
Nahibaluan nga ang biktima ang kasamtangan nga live in partner sang babaye nga ginkilala lamang kay Alyas Rubi, samtang ang suspek amo ang ginaaligar nga kabit ukon ikatatlo sini nga karelasyon.
Bulag suno pa sa bana nga maestro ang babaye kag ginaupod subong ang biktima nga yara sa kritikal nga kondisyon.
Sa subong ginabulong sa hospital na ang biktima samtang nagpalagyo naman ang suspek.
Nagapadayon naman ang imbestigasyon sang kapulisan sa insidente.
