KORONADAL CITY – Padayon sa karon ang imbestigasyon sang Koronadal City PNP angot sa panibag-o nga kaso sang investment scam sa syudad..
Sa esklusibo nga interbyu sang Bombo Radyo Koronadal kay Pol Lt Col Joefel Siason, hepe sang Koronadal City PNP, padayon sa karon ang pagpangita nila batuk sa ginareklamo sang mga biktima nga si Diana Roldan makaligad suno pa gindalagan sini ang minilyon nga kwarta sang mga investors.
Suno kay Siason, nakamonitor ang PNP sa nasambit nga kaso apang ginpa-athag man sini nga magdirekta na sa piskalya ilabi na kun may kaangtanan sa scam ang isyu.
Preparado man nga magpatigayon sang manhunt operation ang kapulisan ilabi na kun may yara na sang mabaskog nga balasehan ukon ebidensya batuk sa nasambit nga suspek.
Kaangot sini, gin-awhag sang PNP ang publiko nga magdoble halong ilabi na kun may nagatanyag sang tuman ka dako nga interes.
Nag-ugat ang nasambit nga isyu makaligad nagpadulong sa talatapan sang Koronadal PNP kahapon ang mga biktima ang recruiter sang Dianamite investment scam nga si Diana Loyola Roldan makaligad nagpalagyo suno pa dala ang masobra P6 milyon nga kwarta sang mga investors.
Abri naman ang linya sang Bombo Radyo Koronadal para kay Roldan agud makapaathag kag madepensaran ang iya kaugalingon batok sa mga akusasyon nga ginahaboy batok sa iya.
