KORONADAL CITY– Nagapadayon sa karon ang imbestigasyon sang mga otoridad angot sa nasapwan nga bangkay sang isa ka babaye sa banwa sang Parang, Maguindanao.
Suno kay Pol. Lt. Col. Ibrahim Jambiran, hepe ng Parang PNP, ang biktima suno pa ang isa ka graduating student kag residente sang Brgy Poblacion 1, sa nasambit nga banwa.
Nagagwa sa inisyal nga imbestigasyon nga posible ginlugos anay antes ginpatay ang biktima nga wala na ginpangalanan pa bangud man sa hingyo sang pamilya sini.
Narekober lang suno pa ang bangkay sa biktima indi malayo sa puluy-an sini.
Samtang, bangud sa tuman nga kaakig sang mga tupad balay sang bitkima, ginkulata sang mga ini ang 2 ka ginapatihan nga mga suspek nga yara suno pa sa impluwensya sang iligal nga droga antes paman ang pagturn-over sa Parang PNP.
Nagresulta naman ini sa kamatayon sang isa sa mga suspek nga si Esrael Sarip bangud sa mga pilas kag lagod nga nakuha sini halin sa mga akig nga residente samtang yara naman sa ospital ang isa pa ka suspek nga ginkilala kay Tato Bualan alyas Ato.
Magluwas sa mga ini, padayon man nga ginapangita sang PNP ang 2 pa ka mga suspek sa krimen nga sanday Samsudin Sarip alyas Mansuh kag Sulayman Sarip alyas Mangcao.
Sa ngayon, natalana na nga pasakaan sang nagakaigo nga kaso ang mga suspek.
Nahibaluan nga lunsay himata man sang biktima ang 4 ka mga suspek sa krimen.
