KORONADAL CITY – Relokasyon kag indi lamang temporary nga pagbakwit ang ginrekomendar sang Mines and Geosciences Bureau (MGB-12) sa mga residente nga nagapuyo sa masobra 5 ka Sitio sang Brangay Ned, Lake Sebu, South Cotabato nga apektado sang landslide kag tension cracks tuga sang wala untata nga pagbubo sang ulan sa probinsiya.
Mangin ang mga dalanon sang mga residente sa nasambit nga banwa ang kinahanglan nga isaylo bangud nga delikado para sa mga pumuluyo ang posibilidad nga matabo liwat ang pagkatiphag sang duta.
Sa interbyu sang Bombo Radyo Koronadal kay Mayor Floro Gandam sang Lake Sebu, South Cotabato, madugay na nga ginatutukan ang problema nga ini kag ginapreparahan na sa subong ang lugar nga mahimo nga relocation area sang mga residente nga apektado.
Nahibaluan nga nagpatigayon sang assessment kag evaluation ang MGB-12 sa lugar kun diin nakita mismo ang dako nga litik sa duta sang mga provincial roads kag ang pagkatiphad sang duta sa mga puluy-an nga yara sa ibabaw sang bukid mangin ang mga buluthuan nga sadto pa man may problema na sa tion nga magbubo ang ulan ulan.
Ang nasambit nga mga Sitio ang ginalakipan sang Sitio Eldolog, Tuburan, Polosubong, Kiantay kag Tawang Dagat.
Sa bahin lamang sang Sitio Tawang Dagat yara sa masobra duha ka ektarya ang natiphag kag may nakita nga mga litik sa duta.
Kaangot sini, nagpanawagan ang opisyal sang paghangop kag kooperasyon sa mga residente nga apektado.
