KORONADAL CITY – Nagapadayon sa karon ang imbestigasyon sang mga otoridad sa panibago nga pagpasigabong sang granada sa substation sang Municipal Police Station sa banwa sang Tboli, South Cotabato.
Sa interbyu sang Bombo Radyo Koronadal kay PO2 Glen Ulysis Lama sang Tboli PNP, ginhabuyan sang mga armado nga lalaki ang substation sang Tboli-MPS sa Sitio Tablugan, Barangay Aflek nga nagresulta sa pagkapilas sang 1 ka persona.
Ginkilala ang napilasan nga si Erwin Piang, 25 anyos, utility sang Tboli-MPS substation kag residente sang nasambit nga lugar.
Suno kay PO2 Lama, yara sa sulod sang substation si Piang sang ginhabuyan sang granada sang mga suspek ang lugar rason nga naigo ini.
Naka-angkon sang pilas sa nagkalain-lain nga parte sang iya nga lawas ang biktima nga gilayon gindangat sa ospital.
Naguba naman ang bahin sang substation kun sa diin nawasak ang pila ka mga salamin sang bintana sini.
Nagagwa sa imbestigasyon nga bago pa man ang insidente may nakitan nga mga residente nga 3 ka armado nga lalaki nga naka-jacket nga may bitbit nga armas nga yara sa palibot sang substation kun sa diin ginpalukpan pa sang mga ini ang pila ka residente didto.
Sa karon, ginahibalo pa sang PNP ang motibo sang paghaboy sang granada kag ang identity sang grupo nga yara sa likod sini.
