KORONADAL CITY – Ginkilala na sang Western Mindanao Command ang isa sa mga napatay nga suicide bombing suspect nga yara sa likod sang mga pagpamomba sa Indanan, Sulu nga ginkapatay sang mga suldado kag sibilyan sang nagligad nga bulan sang Hunyo.
Sa interbyu sang Bombo Radyo Koronadal kay Major Arvin Encinas, tagpamaba sang Western Mindanao Command, ginkilala ang nasambit nga bomber nga si Norman Lasuca nga isa ka Pilipino kag kalakip sini ang wala pa makilala nga isa ka Moroccan.
Madumduman nga tatlo sa mga suldado ang napatay lakip na nag duha ka sibilyan sa pag-atake sang mga suicide bomber sa kampo sang militar sa nasambit nga lugar.
Magluwas diri, padayon man ang monitoring sang AFP sa pito ka dumuluong nga mga terorista nga ginasiling nagtipyok sa BIFF kag Abu Sayyaf agud nga malikawan ang spillover sang kalakasan sa rehiyon.
Samtang, ginkumpirmar man ni Encinas nga napatay ang isa ka suldado nga ginkilala kay Sgt. Mahmud Jamad sa natabo nga engkwentro sa Shariff Saydona Mustafa, Maguindanao batuk sa BIFF.
