KORONADAL CITY– Wala na nagpapugong pa ang mag-asawa nga sanday Mr. kag Mrs. Santiago nga magpadulong sa waragwagan sang Bombo Radyo Koronadal agud magpangayo sang bulig nga mabalik ang ila kwarta nga ginpangabudlayan makaligad mabiktima sang Kabus Padatoon o KAPA investment scam.
Sa interbyu sang Bombo Radyo Koronadal sa mag-asawa nga Santiago nga lunsay mga senior citizen, naglab-ot sa P405,000 ang ila gin invest nga kwarta sa KAPA ni Joel Apolinario makaligad makumbinsir sang mga abyan sa kagustuhan nga mas magnami ang ila kabuhi.
Suno kay Mrs. Santiago, tatlo ka bes sila nga nag pay-in humalin Mayo 24 tubtob Hunyo 6, 2019 kun sa diin ang gin usar nila nga kwarta amuh ang ila savings kag retirement sang mister nga isa ka anay Overseas Filipino Worker.
Tuman naman ang pagmahay sang magtiayon sa natabo sa ila kwarta kag gin-awhag si Apolinario nga magsungka na kag ibalik ang ila kwarta apisar wala na ang interes.
Sa karon desidido na ang mag-asawa nga ipalapit sa National Bureau of Investigation ang reklamo batuk sa mga kaupdanan sini sa investment scam.
