KORONADAL CITY– Nagapadayon ang imbestigasyon sang mga otoridad sa nagluntad nga pagpang-ambush patay sa mag-amay sa banwa sang Ampatuan, Maguindanao.
Ginkilala ang mga napatay nga sanday Timuay Orlando Santos kag bata sini nga Michael nga lunsay residente sang Barangay Saniag, Ampatuan.
Samtang, pilason naman ang kaupdanan sang mga biktima nga si Kimboy Fernalino nga ginabulon subong sa Maguindanao provincial hospital.
Nagguwa sa imbestigasyon sang mga otoridad nga sakay ang mga biktima sa motorsiklo kag papuli na sa Barangay Saniag sang tinambangan sang mga wala pa nakilalhan nga mga armado.
Sa subong ginahibalo pa sang mga otoridad ang motibo sang pagpang ambush amo man ang pagkilala sa mga suspek.
Nahibaluan nga masubra sa 10 ka katapo sang Teduray community leaders na ang napatay halin sa mga banwa sang Ampatuan, Shariff Aguak, Datu Unsay kag Datu Saudi nga wala pa nahatagan sang hustisya tubtob subong.
