KORONADAL CITY – Padayon nga ginaimbestigaran sang kapulisan ang serye sang mga pagpangluthang nga nagluntad sa Cotabato City sang damlag lang.
Una nga napagkit ang insidente sang pagpangluthang sa Brgy. Rosary Heights pasado alas 10 sang aga sang Miyerkules kun sa diin ginluthang-patay sang ginapatihan nga riding-in-tandem suspects si Jimran Midtimbang, samtang ginkapilas naman sang iya upod nga si Benjie Abdilla.
Makaligad ang duha ka oras, ginluthang ang apat ka tawo kalakip ang miyembro sang MILF.
Ginkilala ang mga biktima nga sanday Norodin Mangandian Guiaman, barangay chairman sang Barangay Tuka, Mamasapano, Maguindanao; kag mga kaupdanan sini nga sanday barangay treasurer Sindatu Agao, MILF-BIAF member Basser Ampatuan kag isa ka Alwaida Mangacop.
Base sa imbestigasyon, sakay suno pa ang mga biktima sa Toyota Vios sang ginluthang sang mga wala pa nakilal-an nga mga suspek.
Samtang ang ikatatlo nga insidente ang nagluntad pagkagab-i sa bahin sang Prk. Buaya-Buaya, Brgy. Kalanganan Dos kun sa diin ginkilala ang biktima nga si Jainudin Guiaman, 21 anyos, kag residente sang Brgy. Macabiso, Sultan Mastura, Maguindanao.
Ginahibalo pa sang mga otoridad ang motibo sa kada insidente sang pagpangluthang.
