KORONADAL CITY- Nakapreso na sa karun ang apat ka persona samtang yara naman sa kustodiya sang mga otoridad ang duha ka menor de edad makaligad madakpan sa ginpatigayon nga drug buy bust operation sang Prk. Yellow Bell, Brgy. New Isabela Tacurong City.
Sa impormasyon nga nakuha ni Bombo Correspondent Larry Geronio, ginpangunahan sang Philippine Drug Enforcement Agency o PDEA 12 ang operasyon sa bulig sang Tacurong City PNP batuk sa anom ka persona nga nalamita sa iligal nga droga.
Ginkilala ang mga natikma nga sanday alyas Mark kag alyas Ian mga menor de edad, Roger Belgira Castillanes, 23, isa ka laborer, Wilfred Posadas Palobas, 25, mekaniko, Arnold Villamor Posadas, 35 nga mga residente sang nasambit nga barangay samtang arestado man ang ginapatihan nga drug courier nga si Edmor Villamor, 44 anyos nga taga Digos, Davao del Sur.
Narekober naman sa posisyon sang mga suspek ang ginapatihan nga shabu.
Natikma ang mga ini sang makigtransaksyon kag mabaklan sang iligal nga droga sang isa ka PDEA agent.
Gilayon naman nga ginpasakaan sang kaso nga paglapas sa RA 9165 o Dangerous Drusg Act of 2002 ang mga nadakpan nga suspek.
