Hinihiling ng kampo ni Senador Ronald dela Rosa na maghain ng motion for reconsideration matapos ibasura ng Korte Suprema ang kanilang petisyon para sa temporary restraining order (TRO) laban sa posibleng pag-aresto at paglipat sa kanya sa kustodiya ng International Criminal Court (ICC).
Ayon sa kanyang legal team, gagamitin nila ang lahat ng available na legal remedies para kuwestiyunin ang desisyon ng Korte Suprema.
Si Dela Rosa ay nahaharap sa kasong crimes against humanity kaugnay ng kampanya kontra ilegal na droga noong administrasyon ni dating Pangulong Rodrigo Duterte mula 2016 hanggang 2022, kung saan siya ang naging hepe ng Philippine National Police.
Itinatanggi ng senador ang anumang partisipasyon sa mga alegasyong extrajudicial killings.
Nauna nang iniulat na hinahanap siya ng mga awtoridad upang ipatupad ang arrest warrant na inilabas ng ICC, pero giit ng kanyang kampo, wala umanong hurisdiksyon ang mga lokal na ahensya para magpatupad ng utos mula sa foreign court.
Lumala pa ang kontrobersiya matapos siyang hindi makita sa loob ng ilang buwan, biglang lumutang sa Senado, at pagkatapos ay muling umalis noong Mayo 14 ng madaling araw. Sa ngayon, hindi pa rin malinaw ang kanyang kinaroroonan.
