KORONADAL CITY- Nakapreso na sa karun ang 4 sa 5 ka mga suspek sa pagpanglugos kag brutal nga nagpatay sa 9 anyos nga bata nga babayi sa Poblacion, Tboli South Cotabato.
Madumduman nga ginkumpirma sang PNP sa pagpanguna ni Police Chief Inspector Ramil Villagracia hepe sang Tboli PNP ang brutal nga krimen nga nagluntad sa ila nga banwa.
Suno kay PCI Villagracia, ang biktima ang ginlugos malapit lang sa ila puluy-an apang wala nabatian ang pagpangayo sang bulig sang biktima bangud sa kagahod sang videoke.
Posible suno pa nga high sa marijuana ang mga suspek sang ginpatigayon ang nasambit nga krimen kun sa diin makaligad ang luguson ang biktima ginbuksan pa ang tyan sini kag ginkila ang iya internal organs kag ginlapta sa dalan.
Sa karun 4 na sa 5 ka mga suspek nga mga menor de edad ang nadakpan sang mga otoridad kun sa diin ang naabtan ang 1 pa nga nagapaligo sa sapa nga wala sang panapton kag nakitaan sang mantsa sang dugo ang iya nga lawas.
Ginkondenar naman sang mga pumuluyo sang South Cotabato ang nasambit nga krimen kag nagpanawagan nga dapat mas pabaskugon pa ang kampanya sang gobyerno batuk sa iligal nga droga nga nangin tunaan sang paglapnag sang krimen sa palibot.
