Patay ang apat na bata matapos silang pagsasaksakin ng isang lalaki sa isang nursery school sa Kampala, Uganda. Ayon sa mga ulat mula sa kapulisan, isang lalaki na armado ng patalim ang umatake sa Gaba Early Childhood Development Program sa Kampala, isang preschool na nagsisilbing pangangalaga sa mga bata sa maagang edad.
Ang suspek ay isinara ang gate ng paaralan bago isinagawa ang krimen, na nagresulta sa pagkamatay ng apat na bata. Agad naman tumugon ang mga awtoridad at inaresto ang suspek. Sa ngayon, patuloy na iniimbestigahan ng kapulisan ang motibo ng lalaki sa ginawang pamamaslang, ngunit wala pang malinaw na detalye ukol dito.
Ang insidenteng ito ay nagdulot ng takot at kalituhan sa komunidad, lalo na sa mga magulang at guro na nag-aalaga sa mga bata sa nasabing paaralan. Ang mga awtoridad ay nagsasagawa ng malalimang imbestigasyon upang matukoy ang mga dahilan ng pag-atake at matiyak ang kaligtasan ng iba pang mga bata sa mga paaralan sa lugar.
