KORONADAL CITY –Ginaawhag sang kapulisan ang pamunuan sang Moro Islamic Liberation Front (MILF) nga magbulig agud maresolbar na ang rido ukon away pamilya nga nagaluntad sa banwa sang Pikit, North Cotabato.
Ginpahayag ni Pikit PNP Chief Police Captain Mautin Pangandigan, ini bangud sa naulamid diri ang mga miyembro sang MILF kun sa diin sa pinakaulihi engkwentro nagresulta ini sa pagkapatay sang 3 ka tawo.
Suno kay Pangandigan, tatlo ka tawo ang napatay makaligad ginluthang sang tandem criminals sa Sitio Dangeya Barangay Bulol, Pikit Cotabato.
Nakilala ang mga biktima nga sanday Mahamed Ahad alyas Sito,28 anyos, Maan Panaggilan, 32 anyos kag Unday Abdulkadir, 29 years old, lunsay mga mangunguma kag nakapuyo sa Barangay Rajamuda, Pikit, North Cotabato.
Nagguwa sa imbestigasyon nga sakay sang motorsiklo ang mga bikima kag pakadto kuntani sa Barangay Lagundi, Pikit kag sang pag-abot salugar diri na ginluthang sang riding in tandem suspects.
Nakaangkon sang pilas halin sa igo sang bala ang mga biktima nga nangin resulta sang ila tigayon nga pagkapatay.
Narekober sa crime scene ang fired cartridge cases sang caliber 5.56 kag 7.62 nga gin-usar sang mga responsable sa pagpangluthang.
Sa subong nagakahadlok na ang mga residente sa lugar sa posibilidad nga maliwat pa ang panghitabo gani nagapanawagan na sila sang bulig halin sa PNP kag MILF.
