Nagpaandam ang Ukraine nga nagaatubang ini sang “seryoso nga kakulangan” sang interceptor missiles matapos wala sang bisan isa sa 23 ka ballistic missiles nga ginpalupok sang Russia padulong sa Kyiv ang nasikop sang air defense system.
Suno sa mga opisyal, indi magnubo sa 15 ka tawo ang napatay sa Kyiv, samtang 8 pa ang napatay sa iban nga bahin sang Kyiv region kag 100 man ang napilasan sa pag-atake.
Bangud sini, nagpanawagan si Ukrainian President Volodymyr Zelensky sa mga kaalyado sang Ukraine nga maghimo sang “malig-on nga desisyon” sa nagahilapit nga NATO summit agud madugangan ang air defense systems sang pungsod.
Ginpahayag ni Zelensky nga 68 ka missiles kag 351 ka attack drones ang ginpalupok sang Russia sa pinakamadakuo nga pag-atake sa Kyiv sa sulod sang isa ka semana.
Apang bisan na-intercept sang Ukraine ang kadam-an sang cruise missiles kag drones, wala ini nakapugong sa mga ballistic missiles bangud sang kakulangan sa interceptor missiles.
Nagbilin ang pag-atake sang dako nga pagkaguba sa Kyiv, lakip ang pagkahugno sang pila ka apartment buildings kag pagpadayon sang rescue operations sa lugar.
