KORONADAL CITY- Kahadlok ang nagtulod sa 16 ka mga miyembro sang komunista kag rebelde nga grupo sang NPA agud magsunka sa militar bangud mas nabatyagan na sang mga ini ang gindeklarar ni Pres. Rodrigo Duterte kag ginmando sa Armed Forces of the Philippines nga all out war batuk sa ila.
Nahibaluan nga boluntaryo nga nagsunka sa 39th IB Philippine Army kag Task Force Kidapawan ang 16 ka mga miyembro sang NPA nga ginalakipan man sang pila ka mga child warriors.
Sa inisyal nga imbestigasyon sa pagpanguna ni Lt. Col. Harold Argamosa, commanding officer sang 39th IB, dako ang posibilidad nga sa ila kun tani igapanghatag ang yara sa 30 ka mga M16 armalite rifles kag sa iban pa nila nga mga kaupdanan nga ginpalusot naman sang 2 ka miyembro sang NPA halin sa Cebu nga naarestar sang nakaligad nga adlaw.
Bangud sini, padayon ang imbestigasyon sang mga otoridad kun may ginaplano pa nga mas malapnagon nga pagpang-atake ang rebelde nga grupo sa North Cotabato.
Sa pihak sini, dako man ang mabulig sa pagsungka sang mga rebelde sa imbestigasyon sang pag abduct kay PO1 Bristol Catalan sang North Cotabato PNP kun sa diin ang NPA sa gihapon ang ginatudlo nga yara sa likod sini.
